ខេត្តព្រះសីហនុ (ភាគច្រើនបានគេស្គាល់ថា កំពង់សោម) គឺជាខេត្តតំបន់ទេសចរណ៍ស្ថិតនៅប៉ែកនិរតីនៃព្រះរាជាណាចក្រកម្ពុជា ជាប់នឹងតំបន់ឆ្នេរដែលមានចម្ងាយ២៣០គីឡូម៉ែត្រ ពីរាជធានីភ្នំពេញតាមបណ្តោយផ្លូវជាតិលេខ៤(មើលស្ថានភាពភូមិសាស្រ្តខេត្ត)។ ខេត្តព្រះសីហនុ ជាខេត្តមួយសម្បូរដោយធនធានធម្មជាតិជាច្រើននិងជាប់ជាសមាជិកក្លឹបឆ្នេរសមុទ្រដ៏ស្អាតបំផុតលើសកលលោកក្នុងចំណោមខេត្តតំបន់ឆ្នេរទាំង៤នៃព្រះរាជាណាចក្រកម្ពុជាគឺ ខេត្តកែប ខេត្តកំពត ខេត្តកោះកុង និង ខេត្តព្រះសីហនុ ដែលបានប្រសិទ្ធិនាមថា ឆ្នេរសមុទ្រកម្ពុជា៖ “តារារៈនាទិសនិរតី” ។
ខេត្តព្រះសីហនុ មានសក្កានុពលធនធានធម្មជាតិដ៏កម្រដែលមានឆ្នេរខ្សាច់ស្អាត បណ្តាកោះដ៏ស្រស់ស្អាត និងខ្យល់អាកាសល្អបរិសុទ្ធ សម្រាប់ទាក់ទាញភ្ញៀវជាតិ-អន្តរជាតិមកសម្រាកកម្សាន្តយ៉ាងច្រើនកុះករ។