ខេត្តព្រះសីហនុ៖ ព្រឹកថ្ងៃចន្ទ ១រោច ខែមិគសិរ ឆ្នាំរកា ព.ស២៥៦១ ត្រូវនឹងថ្ងៃទី០៤ ខែធ្នូ ឆ្នាំ២០១៧ ឯកឧត្តម យន្ត មីន អភិបាល នៃគណៈអភិបាលខេត្តព្រះសីហនុបានអញ្ជើញជាអធិបតីនៅក្នុង ពិធីបិទសន្និបាតសហព័ន្ធយុវជនកម្ពុជា ខេត្តបាត់ដំបង ខេត្តព្រៃវែង និងខេត្តបន្ទាយមានជ័យ នៅសណ្ឋាគារសុខា ខេត្តព្រះសីហនុ។

ក្រោយដំណើរការរយៈពេល២ថ្ងៃរួចមក ក្រោមវត្តមាន ឯកឧត្តមយន្ត មីនអភិបាលនៃគណៈអភិបាលខេត្តព្រះសីហនុនិងឯកឧត្តម ស សុខា តំណាងរាស្ត្រមណ្ឌលព្រៃវែង និងជាអនុប្រធានសហភាពសហព័ន្ធយុវជនកម្ពុជា ទទួលបន្ទុកខេត្តព្រៃវែង បាត់ដំបង និងខេត្តបន្ទាយមានជ័យ គណៈអធិបតីកត់សម្គាល់ឃើញថាក្រុមការងារ និងសមាជិក សមាជិកា សហភាពសហព័ន្ធយុវជនកម្ពុជាខេត្តព្រៃវែង ខេត្តបាត់ដំបង និងខេត្តបន្ទាយមានជ័យបាននឹងបន្តធ្វើសកម្មភាពចុះតាមមូលដ្ឋានដោយឆ្លុះបញ្ចាំងឲ្យឃើញយ៉ាងច្បាស់អំពីឆន្ទៈ និងការប្ដេជ្ញាចិត្តខ្ពស់ក្នុងការតស៊ូខិតខំព្យាយាមប្រឹងប្រែងអស់ពីកម្លាំងកាយចិត្តជំនះនូវរាល់ឧបសគ្គ ឬបញ្ហាលំបាកនានាប្រកបដោយស្មារតីទទួលខុសត្រូវខ្ពស់ក្នុងការបំពេញបេសកកម្មការងារបណ្ដុះបណ្ដាល វិស័យធំៗចំនួន ៤គឺ:
១- ការងារសង្គម និងសប្បុរសធម៌
២- អប់រំ និងកីឡា
៣- ការងារវប្បធម៌ និងសាសនា
៤- ការធ្វើអនាម័យ និងបរិស្ថាន